ابڙو اڪيڊمي Abro Academy
2020-07-18
داخلا نمبر 538
عنوان ٻاٻيهو، تاڙو، مِينهل ڪُوڪر پکي
شاخ پکي
پڙهيو ويو 345
داخلا جو حوالو:
ٻاٻيهو، تاڙو، مِينهل ڪُوڪر پکي
33 سينٽي ميٽر جسامت وارو ڪوئل ڪٽنب جو ھي پکي اصل ڏکڻ ۽ وچ هندستان جو آهي جيڪو اونهاري ۾ اتر ۽ اولهه ڏانهن لڏپلاڻ ڪندو آهي. نر ماد هڪ جهڙا ٿيندا آهن. ھي پکي مٿي کان پُٺيءَ تائين ڪارو آهي، ڳچيءَ کان ڇاتي ۽ پيٽ اڇو اٿس. پُڇ جون چوٽڙيون اڇيون ۽ مٿي تي اڇي ڪاري چوٽي اٿس. ان رنگت ۽ چوٽيءَ سبب مٿس اهو انگريزي نالو پيو آهي. هن پکيءَ کي راجستان ۽ ٿر ۾ پپيهو، ٻاٻيهو، تاڙو ۽ مينهل به چوندا آهن. ان کي شاعريءَ ۾ ڪافي ڳاتو ويو آهي.
ان جو آواز زوردار ٻه آوازي ڪُوڪ تي ٻڌل آهي جنهن ڪري ان کي ’ڪُوڪُر‘ به چون ٿا. ان جي ٻولي زوردار ’پِيو .. پِيُو .. پِي .. پِي .. پِيُو، پِي .. پِي .. پِيُو، يا پيو ..پيو‘ آهي، جيڪا رات ڏينهن پئي ٻڌبي آهي. هي ٽاهڙ پکي نه آهي، اڪثر ڪنهن کليءَ جاءِ تي ڪنهن ڏانڊيءَ تي ويٺو هوندو آهي. مٿي ئي رهندو آهي پر اڪثر هيٺانهن ٻُوڙن ۾ ۽ زمين تي به خوراڪ ڳوليندو آهي. ٻيلن، باغن، پوکن، ٻُوڙن ۽ نيم صحرائي علائقن ۾ به رهي ٿو. سڄو سال، خاص ڪري مارچ کان آگسٽ تائين افزائش نسل ڪري ٿو. ٻاٻيهو پنهنجا آنا هيڙهي جي آکيري ۾ ڏيندو آهي. ھي ماحول : 6 جو پکي آھي.